Са̄мь кӣл байяс
 

 

О̄ллмэ са̄ррнэв са̄мас Идрэ сыйтэсьт центральнэ Скандинавиесьт нуҏҏьт Куэлнэгк нёарк райя не̄лльй е̄ммьнесьт: Финляндиесьт, Швециесьт, Норвегиесьт я Рӯшш-емьнесьт.  Са̄мь кӣл лев финно-угорскэ пӣрас роаӈӈьк, сыйй ра̄ттҍкев соа̄ййв, центральнэ я нуҏҏьта роаӈӈька я 10 югке-налшем са̄мь кӣл:

     
       
Кӣл туххк Кӣлл Са̄ррнэй  Е̄ммьне
       
Соа̄ййв са̄мь кӣл: умэ са̄мь кӣлл
соа̄ййв са̄мь кӣлл   
чо̄фта ва̄нас
600-800 
Ш-Н
Ш-Н
Центральнэ са̄мь кӣл:

питэ са̄мь кӣл 
люлэ са̄мь кӣлл
таввял са̄мь кӣлл


чо̄фта ва̄нас
800 
18 000  
Ш-Н
Ш-Н
Ш-Н-Ф
Нуҏҏьт са̄мь кӣл: 
инари са̄мь кӣлл
колтта са̄мь кӣлл
кӣлт са̄мь кӣлл
ахькэль са̄мь кӣлл
таррьй са̄мь кӣлл
(кемь са̄мь кӣлл)

350
300
700
чо̄фта ва̄нас
чо̄фта ва̄нас
(ка̄де 150 ыгь маӈӈа ?)
Ф
Ф-Р-Н
Р
Р
Р
Ф
 

 

 

Та̄ррьм пугк са̄мь кӣл ле̄в вэсьт ка̄дтмэдтӭ.


 

Куэлнэгк нёарк соа̄ме кӣл

Та̄рьм Куэлнэгк нёарк соа̄ме пугк не̄лльй кӣл (ахькэль, кӣлт, колтта я таррьй кӣл) ле̄в вэсьт ка̄дтмэдтӭ я кӣлоаннӭй выйтнэв са̄мь кӣлэсьт рӯшш кӣлле.
 
Та̄ррьм, кӯсстай, альт 8ОО о̄ллмэнҍ Рӯшш-е̄ммьнесьт лев те̄д са̄мь кӣл баяс. Сӣнэнҍ, вуайй пыйнӭ, 2ОО о̄ллмэдтӭ вуайй коаххче «потенциальнэ кӣл оаннҍегуэйм». Сӣнэнҍ ле̄в кӣл шӣг ре̄яс те̄д: сыйй оа̄нтшэв пугк лубэ е̄ннэ, е̄ннэ сыйе  ма̄ххьтэв са̄ррнэ са̄мь кӣлле, ноа югке рэ̄зэ гуэйке сыйй ев са̄рн ка̄йнханна, ва̄ймленне лубэ во̄фьсе ев са̄рн. Рӯшш-е̄ммьнесьт та̄рьм ва̄нä 1ОО ва̄ймлэсь са̄мь кӣл оаннҍедтӭ е̄ллев. Са̄мас ва̄ймлесь са̄ррнъедтӭ, вуайй це̄ӆӆьке, лев о̄ллмэ, кугк пуэраст я ва̄ллтъенне са̄ррнэв ӣжесь кӣлле ко̄ххт авьтма кӣлле, ныдтҍ э нымьп кӣлле, я кугк оаннӭв са̄мь кӣл югке пе̄йв я югке саесьт.
 
Са̄мь кӣлл тоа̄ййв о̄ннъювв вэ̄зхэллэм (символическэ) кӣлэнҍ, ва̄лльтэ, вӯзьхемь гуэйке, манҍтэ олма ли – са̄мь вай мудта. Ныдтҍшэ вэ̄зхэллэм кӣл о̄нньювв э̄ххтса са̄мь я̄лэсьт, лубэ, го «шоу кӣлл» вэ̄зхалл ӣжесь о̄ллмэ культура. Вэ̄зхэллэм кӣл оаннӭв ев лышшэ о̄ллмэ, ва̄нас тӣдтӭй кӣл, ноа э о̄ллмэ, пуэраст тӣдтӭй кӣл. Е̄намп вэ̄зхэллэм кӣл оаннӭв о̄ллмэ, кугк ва̄йймельт кӯскнэв э̄ххтса са̄мь я̄лла.
 

Я̄наш са̄мь кӣл оаннӭй ев кӯсстэ. Чӯтä кӯсстъев са̄мь кӣлл ва̄йймлесь, кугк ва̄ймельт кӯскнэв э̄ххтса са̄мь я̄лла, о̄ллмэ ке̄сьт ли э̄лл сайй я̄лэсьт я ял выгкэй, го политик я шурьмуз (лидеры). Ноа я̄наш са̄мь кӣл ва̄ймлесь оаннӭй ев кӯсстэ. Тэнн «эйй кӯсстъей» о̄ллмэ туххка ныдтҍшэ мэ̄нънэв я̄наш потенциальнэ кӣл оаннӭй, нӯрр пуллдэг, о̄ллмэ эйй соа̄менҍ выййтма я о̄ллмэ вӯлльгесь я̄л сэенҍ, ва̄лльтэ, кэ̄бп во̄йвишна о̄ллмэ, вуаййпей роавас чоа̄зенҍ  я мудта рэ̄зэгуэйм вуаййпей о̄ллмэ.

 

Го кӣл пайнэмушш ло̄гэнч ва̄сьт я̄ллхэ кӣлт кӣл, гу югкепяййвса кӣл, ку ва̄ллтъенне о̄ннъюваххч югке сэенҍ, танна кӣлт кӣл ва̄ймлесь я потенциальнэ оаннӭй эйй кӯсстъей туххк лыххк шӯрр потенциал. Эвтэс, кунт гуэйке ва̄сьт кӣл пайнэ, бэдҍсуввэв о̄ххпэй, тӣдтӭй о̄дт я та̄ррмъя кӣл о̄ххпэм тӯетҍ, о̄дт о̄ххпэм кырьетҍ я кӣл о̄ххпэм оанҍхесь кэскэтҍ лыгксаххьтэмь гуэйке эвтэс о̄ххпмуж. Лашшенҍ кӣл о̄ххпэм оанҍхэсь кэскэтҍ бэдт лыххкэ е̄на вуаннчмужэтҍ кӣл ва̄ймля оаннӭмь гуэйке са̄мас са̄ррнэм па̄ль югкепийве вуанчнэмь ва̄рэсьт са̄мас са̄ррнэм вырькэтҍ. А̄ннъювв э са̄мь о̄ллмэе эхтнэг сыськасьт кэскэсьт югке пуллдэгэ е̄на э̄ххтса кӣл тӯетҍ выгкэ я ныдтҍшэ выгкэ э̄ххтса тӯетҍ кэскэсьт са̄мь кӣлл ва̄ймлегуэйм, па̄йхьк я̄л выгкэй чӯрьвэгуэйм. Ныдтҍшэ шӯрр тӯйй ли аннҍтэ Куэлнэгкнёарк соа̄ме кӣлэтҍ е̄ннгэдтӭ аля я̄лл сай, ва̄лльтэ, лыххкэ ве̄ххькенҍ мугка тӯетҍ, кугк а̄ннэв кӣлт соа̄ме кӣлэтҍ оаннмуж. Кӣл сай пайнэмь гуэйкэ вял э мугка вуэйймушш лӣннчле вуаяхч, ва̄лльтэ, Скандинавскэ са̄мь о̄ллмэ ва̄лтченҍ шуря пя̄дцэльвуд я тыввьвудт Куэлнэгкнёарк соа̄ме кӣлэ альн. Тэ̄йт тӯетҍ вуаяхч ӣллькье пэ̄йель э̄ххтса оанҍхэсь кӣлт кӣл о̄ххпэм кэскэ Скандинавскэ соа̄ме я Куэлнэгкнёарк соаме гуэйке. Вял кӯсстай мугка лыххк, ва̄лльтэ, Куэлнэгкнёарк соа̄ме кӣлэтҍ э̄ххтэ Скандинавскэ шӣг программатҍ пайнэмь гуэйке са̄мь кӣлэтҍ.

 

 

Са̄мь кӣл я па̄ххкма вя̄ӆӆтэдтмушш

Па̄ххкма вя̄ӆӆтэдтмушш куэлнэгк соа̄мэнҍ коа̄ввэстҍ э̄ххтса чуэдзмуж я пыдтӭ нюэзесь я̄ллмушша социальнэ, экономическе я культурнэ тӯегуэйм. А тэдт ли шӯррьмусс рэ̄сс са̄мь кӣл ка̄дхэм гуэйкэ. Вя̄ӆӆтма са̄мь ка̄дхэнҍ е̄рркъя я̄лсэтҍ, пуазпыннемъ е̄ммънетҍ я ӣжесь вуаннтсэтҍ. Ва̄лльтма, Луявьр сыйтэсьт е̄ннэ вя̄ӆӆтэдтма са̄мь кугкь ев вуаййма соа̄гкэ пэҏт, тӯй, ыдтӭнҍ оа̄фкант сыййт е̄ллъегуэйм о̄ллмэтҍ, ке̄гк соа̄ррнэнҍ югкеналшэм са̄мъ кӣлле (югке са̄мь кӣлле) лубэ диалектэ я кугк выгкэнҍ я̄л ӣжесь-налла мудта сыйтэнҍ, тала пугкэтҍ се̄гьхэмҍ я е̄лхэххьтэнҍ эфт сыйтэсьт. Ко̄ххт вя̄ӆӆтма са̄мь я сыййт е̄ллей моа̄йнсэнҍ, го о̄ллмэ ка̄ньць ка̄нҍцесь э̄ллькэнҍ ла̄йххтэ я ӣввче, куэссь кене са̄рнэ е̄ххк са̄мь кӣлле лубэ диалектэ. Мэннэм гуэйкэ оа̄фкант е̄ннэ соа̄ме э̄ллькэнҍ ка̄нҍц коа̄нҍцсэсь са̄ррнэ рӯшшас.

 

Па̄ххкэм вя̄ӆӆтэдтмушш пуэдтӭ депрессиятҍ я вӣр кадхэмуж пуэдтӭй я̄ллмушша. Лашшэнҍ алкоголизм, шэ̄ннҍтэнҍ социальнэ рэ̄з, ва̄йвашвудт физическэ я психологическэ рэ̄з тӣрвасвудэнҍ.

 

Эйй ва̄нас са̄мме вя̄ӆӆтэдтмуж гуэйкэ пыйенҍ кӣдэтҍ ӣжесь э̄л. Са̄мь э̄ллькэнҍ ко̄рнэ са̄ммьвуд, ва̄йвашвудэнҍ я социальнэ рэ̄зэгуэйм. Пе̄ссэ гуэйкэ дискриминациясьт я стигматизациясьт са̄мь э̄ллькэнҍ ся̄гьхувнэ шӯрр о̄ллмэ эхтнэгэнҍ я я̄наш са̄мме са̄рнэшкудтӭнҍ рӯшас.

 

Та̄ррьм Рӯшш-е̄ммьне са̄мь старъедтэв пайнэ ӣжесь кӣл. Рӯшш-е̄ммьне пэря олмняххт са̄мь культура, са̄мь кӣлэтҍ. Но депрессия, алкоголизм, социальнэ я экономическэ рэ̄з, ёаф, вӣр ка̄дхэмушш ӣджясь ле̄в шӯрр рэ̄з, е̄кхэллмуж лыгк кукесь чӯххкэ альн са̄мь кӣл пайнэм я пыннемь ва̄рэсьт.

 

(Текст: Э. Шеллер, са̄мь кӣлле пыййе ве̄кьхе Са̄ндра Антонова Луяввьр сыйтэсьт.)